Brua over Lora har vore eit stort lyft for Lesja Historielag. Vi ynskjer derfor å ha ei skikkeleg markering av at brua no er på plass. Vi har engasjert Kjøremgrenda Musikkforening til å vere med på å skape ei festleg ramme rundt markeringa. Det vil bli klipping av sløyfeband, diktlesing, talar og helsingar. Og ikkje minst blir det servering av jordgropsteikt lammelår med tilbehør, heimebrygga øl, kaffe, saft og ei spesiell brukake. Denne dagen er all servering gratis!

Vi har bestilt godt ver, og det vil bli god tid til sosialt samvær, til å gå turar i området og til å sjå korleis kverna, stampa, blesteret, og kolmila fungerer. Vi har bra med benker til å sitja på, men vi ventar stort innrykk, så det kan vere lurt å ta med seg campingstol. Vi håpar at mange framlis vil bruke den «gamle» vegen langs sørsida av Lora, men spesielt for den som er dårleg til beins, kan det vere ein fordel å  kome frå Lordalsvegen, avkøyringa ved det kommunale renseanlegget.

Arrangementet blir kunngjort i avisene og med plakatar  –  alle er velkomne!

Dette var tittelen på eit kåseri som Bjørn Austigard frå Eikesdalen heldt i Jønsonbrenna på Lora fredag 31. mai. Over 60 personar hadde samla seg i det gamle steinfjøset som K.M. Bjørneby har ominnreidd til storstugu i Jønsonbrenna. Austigard fortalde på ein underhaldande måte korleis påverknaden frå Lesja og Gudbrandsdalen viste seg i bygningar, rosemåling, steinmuring og mykje anna. Han fortalde også om nokre av dei personane som hadde teke med seg impulsane vestover når dei flytta frå Lesja til Eikesdalen.

Etter kåseriet baud historielaget på kaffe og kringle i det vakre inntunet i Jønsonbrenna.  Det var loddsalg og trekning av gevistar som spente frå antikke blondetruser til nymale byggmjøl frå Lorkverna, Veret viste seg frå si beste side, så alle frammøtte gav seg til og koste seg i den ljose og milde sommarkvelden.

Lesja historielag hadde årsmøte på Lesjaskog skule 20. februar. Årsmelding og rekneskap vart samrøystes godkjend.  Årsmeldinga  er lagt ut på heimesida.

I styret var Oddvar Romundset, Tor Einbu, Kjell Løftingsbakken og Hans Morken på val. Dei tre første hadde takka ja til å halde fram  og vart attvald for to år. Hans Morken hadde sagt frå seg, og Einar Morken vart vald inn i styret for to år. Oddvar Romundset vart attvald som leiar for 1 år. Frå før sit Magnhild Lia, Odd Reidar Hole og Eldrid Riise i styret.

Leiaren orienterte om følgjande saker:

–          Fram til 1. november  foregår det ei  landsomfattande innsamlinga av livsminne. Alle som er fødd før 1950 og som kan tenkje seg å skrive ned livsminne,  kan kontakte Historielaget for hjelp og rettleiing.

–          Historielaget vil vere med på å markere 100-årsjubileet for allmenn røysterett ved å fokusere særskilt på Hanna Flittie. Ho var ei forgangskvinne på fleire måtar, m.a. vart ho vald inn i kommunestyret i 1902  –  11 år før kvinnene fekk røysterett på line med menn.

–          Vi er med på 150-årsmarkering av delinga av kyrkjesoknet den 19. mai – 1. pinsedag.

–          Dugnadsfest på Tunstugu 20. mars

–          Ofiisiell opning av brua ved Lorkverna er  planlagt til 15. juni

–          Dugnader ved Lorkverna  –  restaurering av smie, kultursti og rydding etter brubygginga

–          Markdagar  – styret er opne for forslag

–          Bjørn Austigard kjem til Jønsonbrenna 31. mai og vil m.a. fortelje om kontakten mellom Lesja og Eikesdalen i eldre tider

Elevar ved Lesjaskog skule syrgde for servering av kaffe, rundstykke og kake.  Under kaffen var det loddsal og trekning av mange fine gevinstar. Til slutt heldt direktør ved Gudbrandsdalsmusea, Torveig Dahl eit interessant foredrag med tittelen: «Museum og historielag – samarbeid og arbeidsdeling».