Vellykka årsmøte fredag 22. mars med nærare 30 frammøtte. Årsmelding og rekneskap for 2023 vart gjennomgått og godkjent utan merknader. Arbeidsplanen for 2024 fekk og gode kommentarar.

Medlemskontingenten hadde stått fast på kr 100 i mange år, men vart vedteke å heve til kr 150 for 2025, altså for neste år. Medlemsfaktura for i år blir straks utsendt.

Valet gjekk òg kjapt unna, Eldrid Kaarbø som leiar i nemnda hadde alt klart med kandidatar som hadde sagt seg villig.

Etter sakene og kaffe med biteti heldt Rolf Torbo eit muntert kombinert kåseri om eigen tilknyting til Lesja kopla saman med foredrag om det han kallar «Lesjabanen», altså Raumabanen med vekt på strekninga gjennom Lesja.

Sidan nyttår 2024 har historielaget hatt fast kontortid på Tunstugu kvar tysdag  kl. 11.00. -14.00. Dette er ei prøveordning som skulle gå fram til påske. Formålet er at interesserte kan koma innom, slå av ein prat om det vi driv med, koma med forslag og gjerne opplysningar m.v. som kan vera til nytte i historielagsarbeidet.

Vi som har bemanna kontoret synest erfaringane så langt er svært gode. Trafikken har vel ikkje vore overveldande, men vi har hatt fleire besøk og fått nyttige innspel. Dessutan har vi fått gjort ein del arbeid med prosjekt som er i gang og ikkje minst har vi hatt mange hyggelege og nyttige samtalar om det vi arbeider med. 

Siste tysdagen før påske blir kontoret diverre ikkje bemanna, for tysdag 19. mars er det Gudbrandsdalsseminar, og da skal mange av oss dit. Men etter påske vil vi halde fram med å bemanne kontoret på tysdagar 11-14, i alle fall fram til 1. mai.  Vil du sikre deg at det er folk å treffe på kontoret, må du gjerne ringe 480 43 824 på førehand.